জামাই যখন শ্বশুর বাড়ি
হুমায়ুন কবির
(নোয়াখালীর আঞ্চলিক ভাষায় রচিত)
মাগো মা, হুইনছেননি
কিয়ারে বেচু,কি অইছে?
ভাইচাব আইয়্যের
হছানি
আয়ো। আঁই কিল্লাই মিছা কতা কইয়ুম
হেতে অন কোনাই?
উত্তর হাতরতুন আইতে আঁই দেখছি হেতন আডোর দিকে যায়। হেতন আইটতে আইটতে কইছে বেচু আঁই আডোতুন আইতেছি তোগো বাইত যাইয়ুম
আইচ্ছা। ওলেদি ও লেদি হুইনছতনি
কিয়াগো মা, কি কননি, কন
তোর জামাই আইয়্যের। হেতারে ভাত খাবান লাগদন?
খাইব, তই কি অইছে
তই কিছু তো রাঁধন লাইকব।
মা, কিয়া কন, ইছা মাছদি হাপলা রাইনচি, আবার কেলা গাছের বরগে গড়ি মাছদি মরিচখোলা রাইনচি। হেতনে এগেইনদি খাইবো।
কিয়াকছ তুই এগেইন। জামাইরে এগেইনদি ভাত কেন্নে দেয়। ওগ্গা মোরগ জবা করি হালা।
মা,আঁই অন হাইতান্ন।
হেতে আঁরে খাইতে – বইতে আম্মা কয়, চইলতে-হিরতে আম্মা কয়, কতায় কতায় আম্মা কয়। আঁই হাপলা আর গড়িমাছের মরিচখোলা লই জামাইর সামনে যাইতাম হাইত্তামন।
তই আন্নে হরি থাইয়েন। আঁই হেতনরে খাবাইদিয়ুম।
আঁই হরি থাইলে হেতে আঁরে বোলাইবো এত্তরে খানার লাই।
আন্নে জেডিগো ঘরে চলি যাইয়েন।
হেতে আঁরে হিয়ানতুন বার করি হালাইবো।
আঁই কইয়ুম মা জেডির লগে হুরানবাইত গেছে। হেতন আইতে দেরি অইব। ইয়ানদি আঁই হেতনরে খাবাইহালাইয়ুম।
কিয়া কছ তুই এগেইন। হিছামার হিছামার কয়ালে।
নোয়াখাইল্লা ভাষা-আন্তর্জাতিক ভাষা
নোয়াখাইল্লা ভাষা শিখুন-দেশ বিদেশে চাকরি করুন।
লেখক: কবি ও সম্পাদক
